ལཱ་ཁ་མཐོ་སའི་ཆུ་ཞིང་ཚུ་གིས་ མི་སྡེ་འཚོ་སྐྱོང་དང་ ཆུ་རྒྱུན་ཚད་འཛིན་ བརྩོག་རླུང་ཕྱི་སེལ་རྐྱབ་ནི་དང་ སྲོག་ཆགས་རིགས་སྣ་ཚུ་འཁྱམས་སའི་སྡོད་གནས་ ལ་སོགས་པའི་སྐྱེས་ལྡན་གནས་སྟངས་ཀྱི་ཞབས་ཏོག་ཚུ་བྱིནམ་ཨིན། (པར་ ཨེ་ལེགསི་ ཊིརིཌ་ཝེ/ཨི་སི་མོཌ)

གངས་རི་ཚུ་རྒྱུ་སྐར་འཛམ་གླིང་གི་འཕྲོད་བརྟེན་བལྟ་རྟོག་འབད་མི་ལག་ཆས་བཟུམ་ཅིག་ཨིན། ས་ཕྱོགས་གཞན་ཁ་ལས་ཕར་ རྒྱུག་ཆུའི་གནས་སྟངས་ག་དེ་སྦེ་ཡོད་ག་ ལོ་ཐོག་ག་དེ་སྦེ་སྐྱེས་དོ་ག་ དེ་ལས་མི་སྡེ་འཚོ་བའི་གནས་སྟངས་ག་དེ་སྦེ་འགྱོ་དོ་ག་ཚུ་ག་ར་ འཛམ་གླིང་གི་རི་མགོ་མཐོན་པོའི་ས་ཁོངས་དེ་ཚུ་ནང་གི་འགྱུར་བ་དང་འཁྲིལ་དགོཔ་ཨིན། དེ་སྦེ་ཨིན་རུང་ དེ་བཟུམ་མའི་གལ་གནད་ཅན་གྱི་ལུང་ཕྱོགས་དེ་ཚུ་ལུ་ རྒྱལ་སྤྱིའི་བརྩི་འཇོག་གི་ངོས་འཛིན་དེ་ དཔེར་ན་ ཨ་མ་ཛོན་དང་འཛམ་གླིང་གི་སྣེ་ཕྱོགས་སུ་གཏོགས་པའི་ལུང་ཕྱོགས་ཚུ་དང་ཕྱདཔ་ད་ བརྩི་འཇོག་གི་ངོས་འཛིན་དེ་ཧ་ཅང་གིས་ཞེན་སུ་ཅིག་ཨིན། ལོ་ཨ་རྟག་ར་ ཉིནམ་འདི་ཁར་ བརྩི་སྲུང་ཞུ་སྲོལ་ཡོད་པའི་ རྒྱལ་སྤྱི་གངས་རིའི་ཉིནམ་འདི་ ད་རེས་སྣང་མེད་ལུས་ཡོད་པའི་ ནུས་སྟོབས་ལྡན་པའི་ཁར་གལ་གནད་ཅན་གྱི་ལུང་ཕྱོགས་དེ་ཚུ་ལུ་ བརྩི་མཐོང་བསྐྱེད་གནང་ཟེར་ འཛམ་གླིང་ཡོངས་ལུ་དྲན་བསྐུལ་གྱི་ཞུ་བ་ཨིན། ང་བཅས་རའི་གཅིག་མཐུན་གྱི་མ་འོང་པ་འདི་ བཙན་ཐབས་འབད་དགོ་པ་ཅིན་ གནམ་གཤིས་ལ་སོགས་པའི་འགྱུར་བ་དང་འབྲེལ་བའི་གདོང་ལེན་དེ་ ཕན་གནོད་གནས་སྟངས་ཚུ་མངོན་གསལ་ཆེ་བའི་ ས་ཁ་མཐོ་ས་ ག་ནི་བ་ཉམས་ཉེན་ཆེ་བའི་ ས་གནས་དེ་ཁར་ལག་ལེན་འཐབ་དགོ་པའི་ངོས་འཛིན་འབད་དགོཔ་ཡོད། དེ་འབད་ནི་འདི་གིས་ དུས་ཅི་གི་ རྒྱལ་སྤྱི་གངས་རི་ཉིནམ་གི་བརྗོད་དོན་དེ་ཡང་འོས་ཤིང་མཚམས་པ་ཅིན་ཨིན། གངས་རི་སྐྱེས་ལྡན་རིགས་སྣ་ཟེར་བའི་བརྗོད་དོན་འདི་གིས་ གངས་རིའི་རི་རྒྱུད་ལུང་ཕྱོགས་དེ་ཚུ་ དམིགས་གསལ་ཅན་དང་གལ་གནད་ཅན་ཨིན་པའི་བརྡ་དོན་སྤེལཝ་ཨིན། དེ་མ་ཚད་ ང་བཅས་ག་ར་གིས་ཤེས་གསལ་ལྟར་ སྲོག་ཆགས་སྐྱེས་སྣའི་རིགས་ཚུ་ ཚབས་ཆེན་གྱི་ཐོག་ལས་མར་ཉམས་བཏང་ཚུགས་པའི་ ཉེན་ཚུབས་ཀྱི་གནས་སྟངས་ལུ་དྲན་འཚོར་འབད་དེ་ གངས་རི་དེ་ཚུ་ཉེན་སྲུང་འབད་ནི་གི་དོན་ལུ་ གཅིག་སྒྲིལ་བརྩོན་ཤུགས་ལུ་མཉམ་འབྲེལ་རྒྱབ་སྐྱོར་གྱི་དགོས་མཁོ་བཀོདཔ་ཨིན།

གངས་རི་ཚུ་ནང་མཐའ་ཡས་པའི་རིགས་སྣ།

གངས་རིའི་རི་རྒྱུད་ཚུ་གཞན་དང་དོ་འགྲན་ཚུགས་པའི་སྐྱེས་ལྡན་རིགས་སྣའི་རིན་ཐང་ཅན་གྱི་ནོར་མཛོད་ཅིག་ཨིན། རི་རྒྱུད་དེ་ཚུ་གི་ཁྱབ་ཚད་དེ འཛམ་གླིང་གི་ས་གཞི་ཡོངས་བསྡོམས་ལས་བརྒྱ་ཆ་༢༧ རྐྱམ་ཅིག་ཨིན་རུང་ གངས་རིའི་རི་རྒྱུད་དེ་ཚུ་གིས་ཆ་མི་སྙོམས་པའི་གོ་ལས་སྦེ་ ས་གཞི་གི་སྐྱེས་ལྡན་རིགས་སྣ་ལུ་ ཕན་ཐོགས་ཡོད་མི་དེ་ཡང་ དམིགས་གསལ་གྱིས་ རྒྱལ་སྤྱིའི་སྐྱེས་ལྡན་རིགས་སྣ་མང་ཤོས་ཀྱི་གནས་ས་ གངས་མཇུག་གི་མཐའ་ས་ཚུ་ལུ་ཕན་ཐོག་འབདཝ་ཨིན། ལུང་ཕྱོགས་ས་ཁོངས་དེ་ཚུ་གིས་ རྒྱལ་སྤྱིའི་སྲོག་ཆགས་སྐྱེས་ལྡན་གྱི་རིགས་ སྐམ་ས་དང་རློན་སར་གནས་པའི་སེམས་ཅན་དང་ བྱ་རིགས་དེ་ལས་ མངལ་སྐྱེའི་རིགས་ཀྱི་སེམས་ཅན་ བརྒྱ་ཆ་༨༥ གི་སྡོད་གནས་ཨིནམ་མ་ཚད་ མང་ཆེ་ཤོས་ཅིག་ མ་གཞི་ལས་ར་གངས་རིའི་རི་རྒྱུད་ཚུ་ནང་གནས་བཅའ་སྡོད་མི་ཚུ་ཡོདཔ་ཨིན། དེ་བཟུམ་སྦེ་ བཞེས་སྒོའི་ལོ་ཐོག་ཁག་ཆེ་ཤོས་༢༠ གི་ནང་ལས་༦ གི་འབྱུང་ས་གངས་རིའི་རི་རྒྱུད་ཚུ་ནང་ལས་ཨིན། ཞིབ་འཚོལ་ལུ་བརྟེན་ གངས་རའི་རི་རྒྱུད་ཚུ་ནང་ ས་ཁ་མཐོ་བའི་ཁར་ གནམ་གཤིས་སྐྱོ་དྲག་ཡོད་རུང་ ས་གནས་དེ་ཚུ་ཁར་སྐྱེས་ལྡན་རིགས་སྣ་འཕྲོ་མཐུད་དེ་ར་ཡར་འཕེལ་འགྱོ་དོ་ཡོདཔ་སྦེ་ཤེས་རྟོགས་འབད་ཡོདཔ་ཨིན། དེ་མ་ཚད་ གངས་རའི་རི་རྒྱུད་ཀྱི་སྐྱེས་ལྡན་རིགས་སྣ་གིས་ མི་སྡེ་ཚུ་མཐུན་མོངས་མ་ཡིན་པའི་རིག་པ་དང་ཉམས་མྱོང་དང་ལྡནམ་བཟོ་ཐོག་ལས་ལེགས་བཅོས་འབདཝ་ཨིན། དེ་ཡང་ སྐྱེས་ལྡན་རིགས་སྣ་ལུ་བརྟེན་ ཁ་སྐད་དང་ལམ་སྲོལ་སྣ་ཚོགས་དར་ཁྱབ་འགྱོ་དོ་ཡོད་པའི་ སྒྲུབ་བྱེད་ཡོདཔ་ཨིན།

གངས་རིའི་རི་རྒྱུད་དེ་རིགས་སྣའི་དོན་ལུ་ག་ཅིའི་འཐད་ལས་ཡང་རྩ་ཅན་ཅིག་ཨིནམ་ ང་བཅས་ག་ར་གིས་མཐོང་སར་ཨིན། འཛམ་གླིང་མཐའ་དབུས་མེད་པའི་གངས་རིའི་རི་རྒྱུད་ཚུ་ ཆུའི་ཀ་གྱིམ་བཟུམ་ཅིག་ཨིནམ་མ་ཚད་ གནམ་གཤིས་འགྱུར་བགྲོད་མཚམས་འཛིན་འབད་དེ་ ཆུ་མཇུག་མ་སྡེའི་འཚོ་བ་དང་ལམ་སྲོལ་སྣ་ཚོགས་རྒྱུན་སྐྱོང་འབདཝ་ཨིན། ཧིན་དུ་ཀུཤ་ཧི་མ་ལ་ཡའི་རི་རྒྱུད་ཀྱིས་ འཛམ་གླིང་ནང་གི་གངས་རིའི་རི་རྒྱུད་རིམ་ལུགས་གཞན་མི་ཚུ་དང་ཕྱདཔ་ད་ མི་གྲངས་ཐེར་འབུམ་༢ དེ་ཅིག་ལུ་ སྐྱེས་ལྡན་གནས་སྟངས་ཞབས་ཏོག་གི་ཆ་རྐྱེན་འབདཝ་ཨིན།

ཧིན་དུ་ཀུཤ་ཧི་མ་ལ་ཡ་རི་རྒྱུད་ལུ་ཉེན་ཚུབས།

ཧིན་དུ་ཀུཤ་ཧི་མ་ལ་ཡ་རི་རྒྱུད་འདི་ ཡ་མཚན་ཅན་གྱི་སྲོག་རྩ་དང་ ས་མཚམས་ཕན་ཚུན་འབྲེལ་ཟབ་ཅན་གྱི་ སྐྱེས་ལྡན་རིགས་སྣའི་བཙན་ས་ཅིག་ཨིན། ཧིན་དུ་ཀུཤ་ཧི་མ་ལ་ཡའི་རི་རྒྱུད་ནང་འཁོད་ གྲོང་སེབ་གྱི་མི་སྡེ་བརྒྱ་ཆ་༨༥ དེ་ཅིག་ ཁོང་རའི་འཚོ་སྐྱོང་གནས་སྟངས་ སྐྱེས་ལྡན་རིག་སྣ་ལུ་བརྟེན་སྡོདཔ་ཨིན། ལུང་ཕྱོགས་འདི་ སྔོ་ཤིང་སྐྱེས་སྣ་༣༥༠༠༠ ལྷགཔ་ཅིག་དང་ སྲོག་ཆགས་སེམས་ཅན་རིགས་སྣ་༢༠༠ ལྷགཔ་ཅིག་གི་སྡོད་གནས་ས་ཁོངས་ཨིན། ཡིད་སྤྲོའི་གནད་དོན་ཅིག་ ད་རེས་ང་བཅས་ཀྱིས་གསོ་སྐྱོང་འཐབ་མི་བྱ་རིགས་ལས་འགོ་བཟུང་ ལོ་ཐོག་དང་སེམས་ཅན་ལེ་ཤ་ཅིག་ རི་རྒྱུད་དེ་ཁར་ལས་བྱུང་ཡོདཔ་ཨིན་པའི་ཁར་ ང་བཅས་ཀྱིས་ད་ལྟོའི་བར་ན་ཡང་ སྐྱེས་སྣ་གསརཔ་འཐོབ་ཐོབ་སར་ཡོདཔ་ཨིན། སྤྱི་ལོ་༡༩༩༨ དང་༢༠༠༨ ཀྱི་བར་ན་ ཧི་མ་ལ་ཡ་རི་རྒྱུད་ལུང་ཕྱོགས་རྐྱངམ་ཅིག་གི་ནང་ལས་ར་ ཆ་སྙོམས་ལོ་རེ་ལུ་སྐྱེས་སྣ་གསརཔ་༣༥ རེ་གསར་ཐོབ་སྦེ་ཐོ་བཀོད་འབད་ཡོདཔ་ཨིན།

ཧིན་དུ་ཀུཤ་ཧི་མ་ལ་ཡ་རི་རྒྱུད་འདི་ནང་ རྒྱལ་སྤྱིའི་སྐྱེས་ལྡན་རིགས་སྣའི་བཙན་ས་༤ དང་ ཡུ་ནེས་ཀོ་རང་བཞིན་སྲོལ་ཁྱུན་ས་ཁོངས་༦ རྒྱལ་སྤྱིའི་ཆུ་གནས་ས་ཁོངས་གལ་ཅན་ རཱམ་སར་ས་ཁོངས་༣༠ དང་ གལ་ཅན་གྱི་བྱ་དང་སྐྱེས་ལྡན་རིགས་སྣའི་ས་ཁོངས་༣༣༠ གིས་ཁྱབ་ཡོདཔ་ཨིན། རི་རྒྱུད་འདི་ ལམ་སྲོལ་སྣ་ཚོགས་ཀྱིས་ཁྱབ་པའི་ས་གནས་ དངོས་འབྲེལ་ལག་ལེན་ཅན་གྱི་ ཁ་སྐད་༡༠༠༠ ལྷགཔ་ཅིག་ཡོད་པའི་ཁར་ ལམ་སྲོལ་དེ་ཚུ་དང་འབྲེལ་བའི་ མཐུན་མོངས་མ་ཡིན་པའི་ སྔར་སྲོལ་ཤེས་ཡོན་ལམ་ལུགས་ལེ་ཤ་ཅིག་གིས་ཁྱབ་ཡོད་པའི་ས་གནས་ཅིག་ཨིན།

ཨིན་རུང་ ད་རེས་སྐྱེས་ལྡན་གནས་སྟངས་ཆ་མཉམ་གྱི་ནང་ལུ་ ལོག་སྤྱོད་དར་ཁྱབ་ཆེ་བའི་ཁར་ གནམ་གཤིས་འགྱུར་བགྲོད་ལུ་བརྟེན་གནས་སྟངས་ཧེང་སྐལ་ཚབས་ཆེན་བཟོ་དོ་ཡོདཔ་ཨིན། ཉེན་ཚུབས་ཆེ་བའི་གལ་གནད་ཅན་གྱི་ སྐྱེས་ལྡན་གནས་སྟངས་ ནག་ཚལ་དང་ ཆུ་ཞིང་ རི་རྒྱུད་དང་གངས་རི་དེ་ཚུ་ བརླག་སྟོར་གྱིས་ སྐྱེས་ལྡན་གནས་སྟངས་དང་སྐྱེས་སྣའི་བར་ན་གི་འབྲེལ་བ་ལུ་འགྱུར་བཅོས་དང་ཡང་ན་ གནོད་ཚབས་ཆེན་དྲག་བཟོ་དོ་ཡོདཔ་ཨིན། ཧིན་དུ་ཀུཤ་ཧི་མ་ལ་ཡ་རི་རྒྱུད་འདི་ཡང་ དམིགས་གསལ་མེད། ད་ལྟོ་གི་ སྐྱེས་ལྡན་རིགས་སྣ་དང་ས་གཞི་མར་ཉམས་གྱི་གནས་ཚད་འོག་ལུ་ ང་བཅས་ཀྱིས་ རྒྱ་གར་ཧི་མ་ལ་ཡ་ནང་གི་གནས་ངེས་ཅན་གྱི་སྐྱེས་སྣ་བཞི་དཔྱ་གཅིག་ དུས་རབས་འདི་གི་མཇུག་ལུ་རྩ་མེད་འགྱོ་ས་མཐོང་ནི་གི་ཉེན་ཁ་ཡོད། ང་བཅས་རའི་ བལྟ་རྟོག་མེད་པའི་ཐོད་སྐྱེད་ལོག་སྤྱོད་དང་ རི་དྭགས་ས་ཁོངས་ཚུ་ནང་ཧམ་འཛུལ་འབད་བའི་བྱ་སྤྱོད་ཚུ་གིས་ གནོད་ཚབས་ཆེ་དྲག་སྦེ་ར་ཡོད་མི་དེ་ཡང་ སེམས་ཅན་ལས་མི་ལུ་འབུ་བའི་ནད་གཞི་ ཉེན་ཚུབ་ཅན་གྱི་ནད་ཡམས་ཀོ་བིཊ་-༡༩ གིས་ ང་བཅས་ཀྱིས་རང་བཞིན་ལུ་བདག་མེད་དང་ངན་སྤྱོད་འབད་བའི་གནས་སྟངས་གསལ་སྟོན་འབད་ཡོདཔ་ཨིན།

སྤྱི་རུབ་ཀྱི་སྐད་སྒྲ།

གངས་རིའི་སྐྱེས་ལྡན་རིགས་སྣ་ཉམས་ཆགས་མར་ཕབ་ཀྱི་ལུ་དོན་ལུ་ ཧིན་དུ་ཀུཤ་ཧི་མ་ལ་ཡ་རི་རྒྱུད་ཀྱི་མི་སྡེ་ཚུ་གིས་ བརྩོན་ཤུགས་བསྐྱེད་ཡོད་པའི་དཔེ་དག་པ་ཅིག་ར་ཡོདཔ་ཨིན། དེ་བཟུམ་མའི་དཔེ་གཅིག་ རྒྱ་གར་གྱི་ས་ཁ་མཐོ་སའི་སོ་ནམ་ཞིང་པ་ཚུ་གིས་ སོན་རིགས་བརྗེ་སོར་དང་ སླར་སྤྱོད་དེ་ལས་ བསགས་འཇོག་གི་ཐོག་ལས་ ལོ་ཐོག་གི་སོན་རིགས་སྣ་ཚོགས་ཉམས་སྲུང་ལུ་བརྩོན་ཤུགས་བསྐྱེད་ཡོད་མི་དང་། ནེ་པཱལ་ཤར་ཕྱོགས་ཀྱི་མི་སྡེ་ཚུ་གིས་ བྱི་ལི་དོམ་འཁྱམས་སའི་ས་ཁོངས་ཉེན་སྲུང་འབད་ཡོད་མི། འབྲུག་ལུ་ ཁྲུང་ཁྲུང་སྐེ་ནག་གྱི་གནམ་དགུན་གྱི་འཁྱམས་ས་ཉེན་སྲུང་འབད་ཡོད་མི་དང་ ནུབ་ཕྱོགས་ཧི་མ་ལ་ཡ་རི་རྒྱུད་ནང་རྩ་ཅན་གྱི་སྐྱེད་ཚལ་ཉེན་སྲུང་། རྒྱ་གར་གྱི་ བྱང་ཕྱོགས་སི་ཀིམ་ནང་ འཛུམ་ས་སྔར་སྲོལ་ཡིག་ཚང་གིས་ རྩྭ་སྤྱོད་དང་ནག་ཚལ་ཐོན་སྐྱོད་ལག་ལེན་འཛིན་སྐྱོངས་ཚུ་ མངོན་གསལ་ཅན་གྱི་ས་གནས་འགྲོ་འདྲེན་གྱི་དཔེ་གཞན་མི་ཚུ་ཨིན། སེམས་ཤུགས་རུང་བའི་ རྒྱལ་ཡོངས་ཀྱི་ཐབས་བྱུས་ཚུ་ཡང་ལམ་ཕྱོགས་སུ་འོང་དོ་ཡོདཔ་ཨིན། ཧིན་དུ་ཀུཤ་ཧི་མ་ལ་ཡ་རི་རྒྱུད་ཀྱང་རྒྱབ་ཁབ་ཚུ་གིས་ ཨའི་ཅི་ དམིགས་གཏད་༡༡ ཟེར་ སྤྱི་ལོ་༢༠༢༠ ནང་འཁོད་ སྲུང་སྐྱོབས་ས་ཁོངས་དང་གཞན་ཕན་ནུས་ས་ཁོངས་གཞི་བཟུང་གི་ཐོག་ལས་ ཉམས་སྲུང་འབད་དགོ་པའི་བོད་བསྐུལ་ལུ་ ལྷག་བསམ་རྣམ་དག་ཀྱིས་གནས་ཡོདཔ་ཨིན། ཧིན་དུ་ཀུཤ་ཧི་མ་ལ་ཡ་ལུང་ཕྱོགས་ཀྱི་བརྒྱ་ཆ་༤༠ དེ་ཅིག་ སྲུང་སྐྱབས་ས་ཁོངས་སྦེ་ངོས་འཛིན་འབད་ཡོདཔ་ད་ འབྲུག་དང་ནེ་པཱལ་རྒྱབ་ཁབ་ཀྱིས་ ཁོང་རའི་དམིགས་གཏད་ཚད་གཞི་ལས་བརྒལ་ ཁོང་རའི་ས་གཞི་བརྒྱ་ཆ་༥༡.༤༤ དང་ བརྒྱ་ཆ་༢༣.༣༩ རེ་ སྲུང་སྐྱོབས་ས་ཁོངས་འོག་ལུ་ངོས་འཛིན་འབད་ཡོདཔ་ཨིན།

ང་བཅས་རའི་ཕན་བདེ་གི་དོན་ལུ་ ཧིན་དུ་ཀུཤ་ཧི་མ་ལ་ཡ་རི་རྒྱུད་ཀྱི་མི་སྡེ་དང་རྒྱལ་ཁབ་ཚུ་གིས་ ང་བཅས་རའི་གངས་རི་དང་སྐྱེས་ལྡན་རིགས་སྣ་ཉམས་སྲུང་འབད་ནི་གི་དོན་ལུ་ གཅིག་ཁར་ལཱ་འབད་དགོ་པའི་དུས་ཚོད་ན་འཐན་ར་རན་ཡོདཔ་ཨིན།

ང་བཅས་ཀྱིས་ ཡུན་བརྟན་གོང་འཕེལ་གི་དམིགས་དོན་དང་ དེ་ལས་ཧིན་དུ་ཀུཤ་ཧི་མ་ལ་ཡ་རི་རྒྱུད་ཀྱི་རྒྱལ་ཁབ་༨ ཀྱིས་ སྐྱེས་ལྡན་རིགས་སྣའི་ཆིངས་ཡིག་དང་ འཛམ་གླིང་སྤྱི་ཚོགས་ཀྱི་གནམ་གཤིས་འགྱུར་བགྲོད་ལམ་ལུགས་ཆིངས་ཡིག་འོག་ལུ་ འགན་ལེན་འབད་ཡོད་མི་ཚུ་སྒྲུབ་ཐབས་ལུ་ བརྩོན་ཤུགས་བསྐྱེད་ནི་གི་ཁས་ལེན་ཡོད། དེ་མ་ཚད་ ང་བཅས་རའི་ ཧིན་དུ་ཀུཤ་ཧི་མ་ལ་ཡའི་བྱ་ལེན་བོད་བསྐུལ་གྱི་ བྱ་གོ་༥ གིས་ ཞབས་ཏོག་ཡུན་བརྟན་རྒྱུན་སྐྱོང་གི་དོན་ལུ་ སྐྱེས་ལྡན་རིགས་སྣ་དང་ས་གཞི་ཉམས་ཆག་བཀག་འཛིན་འབད་དེ་ སྐྱེས་ལྡན་གནས་སྟངས་ཀྱི་སྐྱེས་སྟོབས་རྒྱ་བསྐྱེད་བཏང་ནི་ལུ་དམིགས་གཏད་བསྐྱེདཔ་ཨིན། འཕྲལ་ཁམས་ཀྱི་ ཧིན་དུ་ཀུཤ་ཧི་མ་ལ་ཡའི་ བློན་པོ་ལྷན་ཚོགས་ཞལ་འཛོམས་དང་གསལ་སྒྲགས་ཀྱིས་ བྱ་ལེན་བོད་བསྐུལ་ལུ་ངོས་འཛིན་དང་རྩ་བརྟན་བཟོ་ཡོདཔ་ལས་ དེ་གིས་ སྐྱེས་ལྡན་རིགས་སྣ་ཉམས་སྲུང་གི་དོན་ལུ་ ས་མཚམས་ཕན་ཚུན་མཉམ་འབྲེལ་དང་ རྒྱལ་སྤྱི་གནས་ཚད་ཁར་མགྲིན་གཅིག་དབྱངས་གཅིག་གི་དོན་ལུ་མདུན་ལམ་བཟོ་ཡོདཔ་ཨིན།

ང་བཅས་རའི་སྡོད་གནས་དང་རི་དྭགས་སྲུང་སྐྱོབ་འབད་ནི་དེ་བསྒུག་དགོཔ་མེད། རྒྱལ་སྤྱི་གངས་རའི་ཉིནམ་༢༠༢༠ གི་ཉིནམ་འདི་ཁར་ ང་བཅས་ག་ར་གིས་ ཧིད་དུ་ཀུཤ་ཧི་མ་ལ་ཡ་རི་རྒྱུད་ཀྱི་ མཐའ་ཡས་པའི་སྐྱེས་ལྡན་རིགས་སྣ་ཉེན་སྲུང་འབད་ནི་ལུ་ ཁས་བླངས་ནན་བསྐྱར་དུ་འབད་གེ!

ཁྱེད་ག་ར་ལུ་རྒྱལ་སྤྱི་གངས་རི་ཉིནམ་འདི་ཁར་སྨོན་ལམ་བཟང་པོ་ཡོད།

པདྨ་རྒྱ་མཚོ།
ཡོངས་ཁྱབ་མདོ་ཆེན།
རྒྱལ་སྤྱིའི་གངས་རི་གོང་འཕེལ་གཅིག་བསྒྲིལ་ལྟེ་བ་(ཨི་སི་མོཌ)

Download